Categoría: Prensa galego

 

AIRA lanza un novo concurso de debuxos dirixido a familiares de socios/as e traballadores/as da Cooperativa. Os debuxos seleccionados formarán parte do Calendario AIRA 2026.

 

Queremos ver AIRA a través dos seus ollos!

 

Quen poden participar?

Nenas e nenos de entre 4 e 12 anos, que sexan familiares de socios ou empregados/as de AIRA.

Temática do debuxo: Que é para ti AIRA?
Convidamos aos/as participantes a expresar, con total liberdade e creatividade, o que AIRA significa para eles/as.

Como participar?
Os debuxos deben entregarse:

Por correo postal, ou en calquera delegación de AIRA,
en sobre pechado, incluíndo:

• Nome e teléfono de contacto
• Número de socio ou empregado/a
• Relación familiar coa/o participante

Data límite: Poden entregar os debuxos ata o 10 de outubro.

Selección e premios:
12 debuxos serán seleccionados polo persoal de AIRA

Entre estes 12, o artista e antigo socio de AIRA, José Randolfe, elixirá 3 gañadores/as finais que recibirán como agasallo unha tablet Samsung Galaxy Tab A9+.

Ao resto de debuxos seleccionados outorgaráselles diplomas de finalista.

Publicación de resultados:
O 17 de outubro de 2025 anunciaranse os debuxos seleccionados e o/o gañador/a.

A ter en conta:
O debuxo debe presentarse en formato A4 en apaisado. Participando neste concurso, aceptas que os debuxos poidan ser utilizados por AIRA como parte do deseño e difusión do Calendario AIRA 2026. Os debuxos que non conten cos datos de contacto serán descalificados.
Aira Sociedade Cooperativa Galega resérvase o dereito de modificar ou anular estas bases sen previo aviso. Así como a declarar deserto o certame se se considera oportuno.

Animádevos a participar, porque queremos que o calendario do próximo ano leve tamén a mirada e a ilusión dos máis pequenos/as da familia cooperativa!

A Dermatosis Nodular Contagiosa (DNC) é unha enfermidade vírica que afecta exclusivamente ó gando bovino. Detectada xa en países como Italia e Francia, existe un risco real da súa entrada en Galicia, polo que as autoridades sanitarias insisten na necesidade de extremar as medidas preventivas.

Que é a DNC?

A DNC está causada por un virus da familia Poxviridae, que afecta ao gando bovino e que provoca lesións cutáneas (nódulos), febre, perda de condición corporal e unha redución significativa da produción de leite. Non supón ningún risco para a saúde humana, nin se transmite polo consumo de carne ou leite.

Vías de transmisión

A enfermidade pode transmitirse por:

• Picaduras de insectos vectores (moscas, mosquitos, carrachas).
• Contacto directo entre animais infectados.
• Vehículos, material ou persoas contaminadas.

Síntomas a vixiar

Os gandeiros deben estar atentos a signos como:

• Febre alta.
• Nódulos na pel, mucosas ou ubres.
• Inflamación dos ganglios linfáticos.
• Descenso na produción de leite e perda de peso.

Ante calquera sospeita, é fundamental contactar inmediatamente co noso servizo veterinario.

Medidas de prevención

• Evitar, na medida do posible, a compra ou traslado de gando de zonas afectadas.
• Garantir unha limpeza e desinfección rigorosa dos vehículos de transporte.
• Manter condicións óptimas de hixiene na explotación.
• Empregar repelentes ou insecticidas en épocas de alta presenza de insectos.
• Incrementar a vixilancia diaria do rabaño.

Consecuencias dunha detección positiva

A DNC é unha enfermidade de declaración obrigatoria. No caso de detectarse un positivo, aplícanse medidas estritas como o baleirado sanitario e a inmobilización do gando nun radio de 20 km, o que supón un forte impacto económico para as explotacións afectadas e a súa contorna.

É importante recalcar que a DNC non representa ningún risco para a saúde humana, nin se transmite mediante o consumo de produtos lácteos ou cárnicos.

Resumo en PDF sobre a dermatose nodular contaxiosa (DNS)

A nosa prioridade é protexer as vosas explotacións e o sector bovino galego. Segue estas recomendacións e mantén o contacto co noso servizo veterinario no caso de calquera incidencia ou dúbida.

 

 

O cambio na directiva farase efectivo a partir do 1 de xaneiro. AIRA recoñece o labor de Ferreiro ó longo destes anos para coordinar a fusión que deu lugar ó que hoxe é a Cooperativa e impulsar proxectos destacados da mesma

 

Cándido Cancelo Cabanas será o novo director xeral de AIRA a partir do 1 de xaneiro de 2025, tras a xubilación de Daniel Ferreiro Otero, quen se despide de AIRA despois de dúas décadas vinculado á Cooperativa e unha traxectoria centrada no impulso do cooperativismo e no sector agroalimentario.

Cándido Cancelo chega a AIRA tras unha destacada traxectoria profesional tanto a nivel nacional como internacional. Cancelo conta con máis de 20 anos de experiencia na dirección e desenvolvemento de proxectos estratéxicos en mercados globais e en distintos sectores. “AIRA é un referente no sector agroalimentario e agardo contribuír a seguir facendo que esta Cooperativa sexa un motor do agro galego, ó tempo que se mantén a carón dos 3.000 socios que a integran”, valora Cándido Cancelo, novo director xeral de AIRA.

Nestes primeiros meses, Cancelo contará coa colaboración do seu predecesor, posto que Daniel Ferreiro continuará vinculado á Cooperativa para facilitar este proceso de remuda na directiva da Cooperativa. “Contar coa colaboración de Daniel Ferreiro ó longo dos próximos meses será de utilidade para que esta transición se faga dun xeito áxil e ordenado”, indica Cándido Cancelo.

Máis de 20 anos na Cooperativa

AIRA agradece a dedicación e implicación de Daniel Ferreiro á Cooperativa durante máis de 20 anos de traxectoria. O seu traballo e entrega foron decisivos en momentos claves da historia e no percorrido da Cooperativa para chegar a converterse no que é hoxe en día.

Ferreiro contribuíu ó entendemento entre as distintas cooperativas tanto para a creación da fábrica de pensos de Taboada, como na integración que deu orixe a AIRA no 2018. Ademais, Ferreiro foi clave para que algúns dos proxectos destacados de AIRA se fixeran realidade, como é a planta de transformación láctea de Melide, o crecemento sostible e exponencial da propia Cooperativa ou novas liñas de negocio como o recente acordo coa firma García Baquero para a fabricación de queixos en Galicia con leite procedente das ganderías socias.

“Daniel Ferreiro foi o faro que nos guiou no camiño da integración para a creación de AIRA e grazas ó seu traballo e tesón viron a luz proxectos cos que conseguir a valorización dos produtos das ganderías e explotacións dos socios e socias de AIRA. Estamos fondamente agradecidos pola súa dedicación ó longo de todos estes anos, facéndoo sempre dun xeito próximo e favorecendo o entendemento”, valora José Manuel López Tellado, presidente de AIRA.

Dende a plataforma para socios de AIRA poderás acceder a toda a túa documentación como socio da Cooperativa e realizar diferentes xestións do día a día da granxa ou explotación agraria.

Nesta información relatamos os pasos a seguir para rexistrarte dun xeito sinxelo. Tamén podes ver que tipos de xestións se poden facer nesta plataforma para socios de AIRA:

Como me rexistro?

1.  Accede a socios.aira.es/alta para cumprimentar os teus datos.

2. Recibirás un correo electrónico para configurar o teu contrasinal.

A miña conta

Pulsando no teu nome, accederás ao panel da túa conta. Neste apartado podes ver os teus datos persoais e atopar todos os documentos de interese á túa disposición, coma os acordos cooperativos de carne ou de leite, entre outra información.

Que xestións podo facer?

 1.  Tratamentos

Libro de tratamentos veterinarios: Podes ver e descargar os libros de tratamentos da túa gandería. Este sistema substituirá o libro en papel, co cal cada vez que se realice un cambio nalgún tratamento, deberá facer clic en “xerar” para ter o teu libro actualizado.

Tratamentos veterinarios: se os tratamentos son creados dende a plataforma de AIRA, terás dispoñibles os datos completos dos diagnósticos dos veterinarios, unha vez que se dispense a receita correspondente. Neste caso só terás que cumprimentar a data de inicio e fin.

No caso de que os tratamentos non sexan dixitais ou se creen nun sistema externo a AIRA, terás a opción de rexistrar manualmente o tratamento facendo clic na opción que aparece ao final da páxina. Debes cubrir os datos marcados cun asterisco (*), como por exemplo a data, o número de receita, o diagnóstico etc.

2. Facturas

Neste menú poderás acceder e descargar todas as túas facturas de compras nas tendas e gasolineiras, vendas de leite ou outras como as de becerros, castañas, artigos de horta etc.

Como solicito axuda?

Podes enviar unha mensaxe ao noso equipo de soporte no menú ‘Contacto’ ou ben consultar as ‘Preguntas frecuentes’ no símbolo ‘?’.

Como descargo a web?

• No ordenador: A través da ligazón socios.aira.es/gl_ES/.
• No móbil: Preme nos tres puntos da esquina superior dereita e selecciona a opción ‘instalar aplicación’ e finalmente volve pulsar en instalar.

 

A innovación e a optimización dos procesos produtivos forma parte dos eixos nos que se move a cooperativa agrogandeira AIRA. Por iso, hai dous anos puxo en marcha o proxecto Trac Plus, financiado polo Ministerio de Asuntos Económicos e Transformación Dixital, dentro da convocatoria Red.es. Para levalo a cabo realizouse unha inversión de 391.895 euros e contouse cunha axuda pública de 156.758 euros.

A través desta iniciativa, buscábase desenvolver solucións dixitais específicas, a través de tecnoloxía de intelixencia artificial e conseguir a dixitalización dos axentes implicados na cadea de valor do sector lácteo, garantir a seguridade alimentaria e unha trazabilidade completa dende a terra ata os produtos que saen da planta de Melide.

Este proxecto desenvolveuse a través de seis grupos de traballo: produción vexetal, alimentación animal, clínica, calidade do leite, reprodución e asesoramento, sendo esta última a base de todas as demais. Nunha primeira fase congregouse toda a información que hai detrás dun produto lácteo, dende os alimentos que comen os animais ata que o consumidor consome o produto. É dicir, toda a información que se obtiña de diversas fontes (OVGAN, Ligal, CEGACOL, Delagros, ODOO, Laboratorio de Mouriscade, Rock River, ASM Lácteo,Kmilk, Gando e información das ADS) dixitalizouse e congregouse nun sistema no que se pode ver cada valor de maneira sinxela.

Para poder levar a cabo a investigación contouse coa colaboración de 10 ganderías que empregan diversos servizos (alimentación, clínica, carros ou ADS, entre outros) e entregan o leite á Cooperativa, de maneira que se podía integrar a información nos produtos transformados.

Con todos os sistemas de información e coa colaboración das ganderías, actualmente cóntase con ferramentas que foron probadas nun contexto controlado, coas granxas participantes e uns lotes de produtos que se fabricaron na planta de Melide. Así, tamén se conseguiu obter a trazabilidade de dentro da planta de Melide deses lotes que serviron de piloto para o proxecto. O seguinte obxectivo é automatizar todos os procesos de introdución de datos.

Finalizado o prazo de execución e cumpridos os obxectivos do proxecto, dende AIRA indican que este traballo continuará en desenvolvemento, dentro das liñas de dixitalización da cooperativa e seguirase profundando para que poida ser unha realidade para todos os socios/as e que as ferramentas desenvoltas se poidan integrar na rutina diaria da cooperativa.

A cooperativa agrogandeira AIRA celebrou hoxe, martes 16 de xullo, a súa Asemblea Xeral Ordinaria en Taboada (Lugo). Durante o encontro, presentáronse as contas do exercicio anterior e realizouse un balance dos datos obtidos, que amosan uns resultados moi positivos.

Neste ano 2023, ao igual que nos anos anteriores, AIRA continuou a medrar ata acadar un volume de negocio de 203,6 millóns de euros, duplicando o volume de negocio dende a fusión. É o resultado dun crecemento sostido que experimentou dende a fusión producida en 2018. En conxunto, todas as empresas do grupo acadaron unha facturación de 241,7 millóns de euros.

AIRA obtivo un EBITDA de 7,6 millóns de euros, un dato que mostra a solidez financeira da entidade e permite afrontar con solvencia os 38,6 millóns de euros destinados a investimentos nas diferentes áreas de actividade: transformación/comercialización, subministración e servicios.

Dos 4,9 millóns de euros de beneficio neto, 2,8 millóns repartiranse, incrementando o capital dos socios e socias.

A cooperativa medrou nas tres grandes áreas de negocio, en especial naquelas actividades de referencia para o sector, coma o leite ou o penso: Comercializando 117 millóns de litros de leite (case o 100 % con certificado de Benestar Animal) e producindo máis de  277.000 toneladas de penso e mesturas, elaboradas nas plantas de Taboada e Sarria toneladas de penso.

Máis aló da relevancia dos propios números, o mais importante é o valor que a cooperativa achega aos socios e ao entorno rural onde desenvolve a actividade, resaltou Daniel Ferreiro, director xeral da cooperativa e encargado de presentar os resultados ante os socios e socias. Ferreiro fixo fincapé na gran problemática que hai nos últimos tempos para conseguir man de obra para traballar no medio rural, “tanto para as ganderías como para a cooperativa está sendo unha traba importante”.

Dixitalización e sustentabilidade

Coa finalidade de aliñarse coa estratexia europea ‘De la Granja a la Mesa’, na cooperativa ponse o foco na sustentabilidade e na dixitalización tanto da propia entidade coma dos socios e socias. Este mecanismo busca un modelo agroalimentario máis sostible e para cumprilo é preciso determinar medidas a aplicar dende os cultivos ou nas granxas ata os propios consumidores/as. En AIRA trabállase nese sentido para conseguir unha economía más limpa e sostible. Como mostra, a cooperativa forma parte do proxecto CEPES, que mellora a competitividade das explotacións de gando de vacún de leite mediante a innovación ecolóxica e a produción hipocarbónica cun asesoramento para a redución da pegada de carbono e hídrica.

Durante o pasado ano estiveron inmersos no proxecto Trac Plus, unha iniciativa financiada polo Ministerio de Asuntos Económicos e Transformación Dixital. A través do mesmo, puidéronse desenvolver solucións dixitais específicas para levar a cabo a dixitalización dos axentes implicados na cadea de valor do sector lácteo (dende a produción agrícola ata os produtos lácteos). Deste xeito, conséguese garantir a seguridade alimentaria e unha trazabilidade completa ata a entrega ao cliente final.

Tamén é preciso destacar o traballo que se está a levar a cabo coas granxas robotizadas e por iso o equipo de AIRA especializouse para ofrecer solucións avanzadas en canto á xestión de datos nestas explotacións, dándolle valor á eficacia e precisión na operativa diaria de estas granxas leiteiras modernas, de xeito que permitan optimizar a produción, mellorar a saúde do rabaño e maximizar a rendibilidade da granxa. Como primeiros operadores en vacún de leite, dende AIRA deséñase un programa que está en continua evolución.

A Asociación Nacional de Especialistas en Medicina Bovina de España (Anembe) celebrou o XXVI Congreso Internacional Anembe de Medicina Bovina. O evento tivo lugar entre os días 24 e 26 de abril en Córdoba (Andalucía) e ata alí foron 12 técnicos de distintas áreas de actuación de AIRA (clínicos, alimentación, ADS, reprodución e calidade do leite).

No evento contan con relatores internacionais de primeiro nivel, que achegan os últimos avances científicos da produción bovina e que ten por finalidade formar aos profesionais veterinarios. Nesta edición, o equipo técnico de alimentación da Cooperativa levou a cabo unha presentación, a cal espertou un grande interese entre os/as congresistas.

José Luis López Salgueiro e José María Viana Ferreiro, ambos veterinarios e técnicos do equipo de alimentación, realizaron unha análise na que estudaron como afectan distintos parámetros na produción en varias explotacións con muxido robotizado, alimentadas con mestura húmida fabricada na planta de AIRA de Sarria. López Salgueiro foi o encargado de presentar os principais resultados no Congreso coa charla ‘A culpa non é da alimentación’.

A particularidade do estudo reside en que todas as granxas analizadas teñen a mesma alimentación, localización e homoxeneidade nos parámetros de xestión robótica no muxido. Estudaron catro granxas, todas próximas, co obxecto de que compartisen un ambiente o máis semellante. As explotacións comparten o mesmo sistema de muxido, o robotizado coa mesma marca. Tamén a mesma alimentación de mestura húmida Unifeed máis penso robot (Airobot©). Están na mesma zona xeográfica, coa mesma climatoloxía (humidade e temperatura) e mesmo sistema de estabulación: libre con cubículos e circulación libre. Tamén comparten o deseño de táboas de alimentación dos robots de muxido e prezos da comida. Por último, outro parámetro que teñen igual é a idade dos xerentes, que son mozos.

Deste xeito as desviacións individuais que existen nos resultados non poderán ser atribuídas á alimentación. As variacións nos resultados deberase a ouros factores: deseño das instalacións, ventilación, confort, manexo de animais, manexo do robot, ocupación etc.